اسلام آباد۔2ستمبر (اے پی پی):صدر مملکت ڈاکٹر عارف علوی آکھیے جو مقبوضہ جموں وکشمیر اچ بھارت دا غاصبانہ قبضہ زیادہ دیر نہ رہسی ، اتھاں سید علی گیلانی جیہے لوک پیدا تھیندے رہ ویسن تے کشمیر جلدی آزاد تھیسی ، او خمیس کوں اتھاں بزرگ حریت رہنما سید علی گیلانی دی غائبانہ نماز جنازہ دی ادائیگی توں بعد میڈیا نال ڳال کریندے پئے ہن ۔ سید علی گیلانی دی غائبانہ نماز جنازہ پارلیمنٹ ہاؤس دے سبزہ زار اچ ادا کیتی ڳئی جیں اچ ارکان پارلیمنٹ، وزراء، آزاد جموں وکشمیر دے صدر اتے وزیراعظم دے علاوہ بئی سیاسی شخصیات وی شرکت کیتی ۔ صدر مملکت سید علی گیلانی کوں خراج عقیدت پیش کریندے ہوئیں آکھیے جو مقبوضہ جموں وکشمیر دی آزادی تئیں انہاں جیہے حریت پسند پیدا تھیندے رہسن ، انہاں آکھیے جو مقبوضہ جموں وکشمیر اچ مسلماناں تے ظلم دے نال بھارت دے اندر اقلیتاں دے ںال سلوک افسوسناک اے، اے صورتحال بھارت دی بربادی دا سبب بݨسی جیڑھا جو خود آپݨے اندر تعصب اتے اقلیتاں دے خلاف نفرت دی بھاہ بھڑکیندا پئے ۔ صدر مملکت آکھیے جو اقوام متحدہ مقبوضہ جموں وکشمیر دے لوکاں کوں انہاں دا حق خود ارادیت ݙیوݨ دا وعدہ پورا نی کیتا جیں توں انہاں دی ساکھ متاثر تھئی اے ، انہاں آکھیے جو کشمیری عوام دیاں قربانیاں رنگ گھن آسن تے انہاں دی آزادی دا خواب وختی شرمندہ تعبیر تھیسی ۔
.jpg)
