دورہ چین اچ صدر شی جن پنگ نال ملاقات مثبت رہی، سی پیک منصوبیں دی رفتار تکھی تھیوݨ نال معاشی تے معاشرتی ترقی اچ بہتری آسی ، نگراں وزیراعظم انوار الحق کاکڑ دی پریس کانفرنس

اسلام آباد۔23اکتوبر(اے پی پی) نگراں وزیراعظم انوار الحق کاکڑ دورہ چین کوں مثبت تے تعمیری قرار ݙیندے ہوئیں آکھیے جو پاکستان سی پیک دا تسلسل جاری رکھݨ کیتے پرعزم اے، سی پیک منصوبیں دی رفتار تکھی تھیوݨ نال معاشی تے معاشرتی ترقی اچ بہتری آسی ، اڄوکے دورہ چین اچ صدر شی جن پنگ نال ملاقات ٻہوں چنڳی رہی ، مشرق وسطیٰ دی صورتحال تے وی عالمی رہنماواں نال ڳالھ مہاڑ تھئی اے ۔ اے ڳالھ انہاں نگران وفاقی وزرا  جلیل عباس جیلانی، مرتضیٰ سولنگی، سرفراز بگٹی، گوہر اعجاز اتے  فواد حسن فواد دے رلے پریس کانفرنس توں خطاب کریندے ہوئیں آکھی اے ۔ وزیراعظم آکھیے چین دے صدر شی جن پنگ دی دعوت تے چین دا اہم دورہ کیتے جیں اچ اہم پیشرفت تھئی اے ، چین دی حکومت، عوام، میڈیا اتے تھنک ٹینکس نال ڳالھ مہاڑ تھئی ، چین نال ساݙی ہر موسم اچ آزمودہ تزویراتی یاری اے ، ایں فریم ورک اچ رہندے ہوئیں مفید تے تعمیری ڳالھ مہاڑ تھئی، پاکستان اچ کوئی وی حکومت ہووے چین نال تعلقات اہمیت رکھیندن ، پاکستان تے چین دی یاری اچ اخلاص دی وجہ توں غیر یقینی دا کوئی عنصر آندا وی ہے تاں او حل تھی ویندے ۔ انہاں آکھیے بی آر آئی فورم اچ چینی صدر عالمی درپیش چیلنجاں دا حل اپݨے 8 نکاتی ایجنڈے اچ ݙتے، اے پورے ایں خطے اتے دنیا کیتے فیدہ مند اے ، ایندے توں زمینی، فضائی اتے سمندری رستیں نال رابطے اچ قربت پیدا کرݨ دا ذریعہ اے تے معاشی و سماجی طور تے فیدہ چاوݨ نال بہتر طرز زندگی دا منصوبہ اے۔ انہاں آکھیے بی آر آئی اچ پاکستان کیتے ٻہوں موقع ہن ، پاکستان دی طرفوں منصوبہ بندی، کوآرڈینیشن اتے تعاون دے ترائے نکتے اساں اتھوں گھن تے آئے ہیسے ، دورے اچ چینی اتے روسی صدور سودھے اہم رہنماواں نال تعمیری ملاقاتاں تھئن ، چینی کمپنیاں تے کاروباری لوکاں نال وی ملاقاتاں تھئن ، توقع اے جو بی آر آئی دے ݙوجھے مرحلے اچ اے کمپنیاں پاکستان اچ سرمایہ کاری اچ حصہ گھنسن۔ انہاں آکھیے ایں موقع تے مشترکہ اعلامیہ وی جاری کیتا ڳئے جیں اچ اقوام متحدہ دی قرارداداں دے مطابق کشمیر دے جھیڑے کوں مکاوݨ دی حمایت کیتی ڳئی ، چین دے حوالے نال پاکستان دی یاری دے عزم دا اساں اعادہ کیتے ، دورے اچ کابینہ دے سارے ارکان اپݨے شعبیں اچ تعاون سانڳے ملاقاتاں کیتن ۔ انہاں آکھیے مشرق وسطیٰ دی صورتحال کوں روسی صدر سودھے بئے اہم رہنماواں نال ملاقاتاں اچ چاتے ، کینیا دے صدر نال صحافی ارشد شریف دے کیس دا معاملہ چاتے۔انہاں آکھیے چین ساݙا ساریں توں نیڑے دوست اے لیکن بدقسمتی نال اساں چینی زبان توں  ناآشنا ہیسے، ایں حوالے نال ریاستی میڈیا اقدامات چاتن، ارومچی دنیا دے جدید اتے ترقی یافتہ شہراں اچ شامل اے، چین نال الیکٹرانک و ڈیجیٹل میڈیا، فلم سودھے ٻئے شعبیں اچ تعاون دے ٻہوں موقع ہن، انہاں توں فیدہ چاوݨا چاہیدے ۔ انہاں ݙسائے جو دورے اچ مختلف شعبیں اچ20 توں ودھ مفاہمت دی یادداشتاں تے دستخط کیتے ڳئن جیڑھے جو اساں کیتے حوصلہ افزاء اے، چین نال تھیوݨ آلے معاہدیں یا کم دے فالو اپ کیتے وزیراعظم ہائوس اچ سیل بݨایا ویندا پئے ۔ ھک سوال دے جواب اچ نگراں وزیراعظم آکھیے چین نال تھیوݨ آلے معاہدیں نال پاکستان اچ تھیوݨ آلی سرمایہ کاری توں اقتصادی ترقی آسی چین توں آوݨ آلی سرمایہ کاری کیتے مربوط حکمت عملی وضع کیتی ویندی پئی اے ۔ اساں دورہ چین توں ”کوآرڈینیشن، کوآپریشن اتے کنسلٹیشن” سکھی اے، حکومتی سطح تے جے اے ترائے چیزاں موثر ہوسن تاں مستقبل بہتر ہوسی۔ روسی صدر نال ملاقات دے حوالے نال سوال دے جواب اچ انہاں آکھیے روسی صدر نال ملاقات گرمجوش اتے چنڳے ماحول اچ تھئی اے ھک ݙوجھے کوں سمجݨ دا موقع ملیے، روس ایں خطے دا اہم ملک اے اساکوں ایندا پتہ اے ،  ایں پورے خطے کوں ھک ݙوجھے نال مزید جڑݨا چاہیدے ۔ ھک سوال دے جواب اچ انہاں آکھیے کہیں وی بندے کوں کہیں وی جماعت اچ رلݨ دی مکمل آزادی اے ، بطور نگراں حکومت ساݙا ایں نال کوئی واسطہ کائنی ۔ھک سوال دے جاب اچ انہاں آکھیے پاکستان عالمی برادری دا ھک ذمہ وار ملک اے، افغان شہری جے پاکستان دے رستے امریکہ سودھے کہیں ملک ونجݨ چاہن تاں انہاں کوں اجازت اے ، اساں غیر قانونی افغانیاں کوں وطن واپس بھیجݨ چاہندوں ، دہشت گردی دے خلاف پاکستان نان نیٹو اتحادی ہئی جیں وݙی جانی و مالی قربانیاں ݙتن اساں غیر قانونی طورتے کئی ݙھاکیں توں پاکستان اچ رہݨ آلے افغانیاں دے انخلاء کیتے کوشاں ہیسے تاں جو او آپݨے ملک ونڄ تے سفری دستاویزات گھن تے پاکستان آون تاں جو انہاں دی نقل و حرکت قانونی ہووے، عرصہ دراز توں پاکستان اچ غیر قانونی رہݨ آلے افغانیاں کوں آپݨا دشمن نی سمجھدے ، ھک ٻئے سوال تے انہاں آکھیے گھاٹے اچ چلݨ آلے اداریں دی وختی نجکاری دے حوالے نال اقدامات چاتے ویندے پئن ۔ عام انتخابات دے سوال دے جواب اچ انہاں آکھیے انتخابی گہما گہمی شروع تھی چکی اے ، توقع اے وختی انتخابی شیڈول دا اعلان تھی ویسی نادرا دی طرفوں بائیو میٹرک ھک قانونی حق اے،  نواز شریف دے پاکستانی ہووݨ دے ناطے انہاں دی بائیو میٹرک ھک تقاضا ہئی ، ایئرپورٹ تے بائیو میٹرک دی سہولت معمول دی کارروائی اے جیڑھی جو  ہر پاکستانی کوں حاصل اے، ایں اقدام کوں لیول پلیئنگ فیلڈ نال جوڑݨ مناسب کائنی ، ساݙا کم ساریاں جماعتاں کوں برابر موقع ݙیوݨ اے اساں نی چاہندے جو کوئی سیاسی جماعت یا سیاسی رہنما سیاسی عمل توں ٻاہر ہووے ایں حوالے نال عدالتی  فیصلیں تے عمل کرݨا اے، ھک ٻئے سوال تے جواب اچ نگراں وزیراعظم آکھیے جو مشرق وسطیٰ دی صورتحال تے فلسطینی صدر محمود عباس نال ڳالھ تھئی اے ، انسانی امداد مصر دے ذریعے غزہ بھیڄݨ یقینی بݨیسوں ، او آئی سی سودھے سارے فورم  استعمال کریسوں ، ساݙی پہلی کوشش اے جنگ بندی تھیوے ، امدادی سامان دی فراہمی دے حوالے نال وی کم تھیندا پئے ایں جھیڑے دے حل سانڳے پاکستان مختلف ملکاں نال رل تے کوششاں کریندا پئے ۔ ارشد شریف دے معاملے تے کینیا دے صدر نال ملاقات دے حوالے نال سوال دے جاب اچ انہاں آکھیے دفتر خارجہ دی طرفوں کینیادے صدر نال ملاقات اچ اے نکتہ شامل کیتا ڳیا ہئی ، کینیا دے صدر ایں تے سنجیدگی دا مظاہرہ کیتے، انہاں یقین ݙیوائے جو اساں انہاں شرپسنداں کوں ڳولیسوں جیڑھے ایندے اچ ملوث ہن ۔ ھک سوال دے جاب اچ انہاں آکھیے میڈیا کوں اشتہارات عوام دے ٹیکس دے پیسیں نال ݙتے ویندن ایندے اچ شفافیت ہووݨی چاہیدی اے ، آزادی صحافت اتے جمہوریت دی جنگ حکومتی سرمائے نال نی لڑی ونڄ سڳدی ، جے کہیں پارلیمنٹیرین دی ݙوڑی شہریت اے تاں اے معاملہ سپریم کورٹ گھن ویسوں ، بغیر تحقیق الزام تراشی اتھاں کلچر بݨ چکیے ۔