اسلام آباد۔13جولائی (اے پی پی):وفاقی وزیرخزانہ ومحصولات سینیٹرمحمد اسحاق ڈارآکھیے انتظامی بورڈ دی منظوری دے بعد بین الاقوامی مالیاتی فنڈ توں سٹیٹ بینک کوں 1.2 ارب ڈالردی پہلی قسط مل ڳئی اے ، پاکستان تکھے ترقی دے رستے تے ٹر پئے تے ایں عمل کوں اساں تکڑا بݨیسوں ۔ میڈیا نال ڳالھ مہاڑ کریندے ہوئیں وزیرخزانہ آکھیے کل رات آئی ایم ایف دے انتظامی بورڈ پاکستان کیتے سٹینڈ بائی پروگرام دی منظوری ݙتی اے ، ایں پروگرام دی تفصیلات اساں عوام کوں پہلے ہی ݙسا ݙتن ۔سٹینڈ بائی پروگرام 9 مہینے دا اے ایندے تحت پاکستان کوں 3 ارب ڈالر دی امداد ملسی، پہلی قسط1.2 ارب ڈالردی ہوسی تے باقی قسطاں ݙو جائزیں دے بعد نومبر اتے فروری اچ ملسن ۔ وزیرخزانہ آکھیے آئی ایم ایف دی طرفوں معاونت دی 1.2 ارب ڈالر دی پہلی قسط سٹیٹ بینک کوں مل ڳئی اے جیں تں زرمبادلہ دے ذخائر اچ بہتری آسی ، سٹیٹ بینک دے اعدادوشماراچ ایندی عکاسی تھیسی ۔ انہاں آکھیے گزریل ھک ہفتے اچ پاکستان کوں مجموعی طور 4.2 ارب ڈالر دی معاونت ملی ، پاکستان ساریاں ٻاہرلیاں ادائیگیاں ویلھے تے کریندا پئے تے ایں ہفتے دے چھیکڑ تے ساݙے زرمبادلہ دے ذخائر 14 ارب ڈالردے نیڑے ہوسن۔وزیرخزانہ آکھیے او وزیراعظم محمد شہبازشریف دادلوں شکریہ اداکریندن جنہاں ایں سارے عمل اچ بالخصوص پچھلے ترائے ہفتے اچ خود حصہ ڳھدا ، وزیراعظم پیرس اچ آئی ایم ایف نال جیڑھے رابطے کیتے ایں توں آئی ایم ایف دے نال نویں انتظامات کوں حتمی شکل ݙیوݨ اچ مدد ملیاے ، انہاں آکھیے آئی ایم پروگرام کوں 9 مہینے تئیں محدود کرݙتا ڳئے تاں جو نویں حکومت آپݨے فیصلے کرسڳے ۔
