اسلام آباد۔17مارچ (اے پی پی) وفاقی وزیر اطلاعات تے نشریات مریم اورنگزیب آکھیا جو زمان پارک اچ ریاستی اداریاں کوں چیلنج کیتا ویندا پے، ولا ولا ویلھا ملݨ دے باوجود عمران خان عدالت اچ پیش نی تھیے، پولیس عدالتی حکم دی تعمیل کیتے زمان پارک اچ ہئی، پولیس اہلکاراں تے پتھراں اتے سوٹیاں نال حملہ کیتا ڳے۔ عالمی نشریاتی ادارہ ”بی بی سی نیوز“ نال ڳالھ مہاڑ کریندیں ہوئیں انہاں آکھیا جو زمان پارک اچ کاروائی وچال پولیس کنے کوئی ہتھیار کائنا ہن، پولیس اہلکاراں کوں سوٹیاں اتے پتھراں نال ماریا ڳے۔ انہاں دی ڳاݙیاں تے پٹرول بماں نال حملےکیتے ڳے۔ ایں مجرمانہ کم پاروں ڈی آئی جی آپریشنز سودھے 65 پولیس اہلکار زخمی تھیے جیڑھے ہسپتال داخل ہن۔ مریم اورنگزیب آکھیا جو عمران خان گرفتاری توں بچݨ کیتے پارٹی کارکناں، تریمتیں اتے ٻالاں کوں انسانی ڈھال دے طور استعمال کیتے۔ انہاں آکھیا جو اڄوکی آڈیولیک ایں ڳالھ دا ثبوت اے جو عمران خان اپݨےکارکناں اتے سینئر عہدیداراں توں پٹرول منڳوا تے پٹرول بماں اچ استعمال کیتے۔ انہاں آکھیا جو عمران خان غیر قانونی عمل نال عدالت تے اثر انداز تھیوݨ دی کوشش کریندے پن۔ آئین پاکستان اچ قانون ساریاں کیتے برابر اے۔ وفاقی وزیر اطلاعات آکھیا جو عمران خان قانون نافذ کرݨ آلے اداریاں نال تعاون دی بجائے قانون شکنی کریندا پے۔ عمران خان کوں ملک اچ خانہ جنگی، تشدد، انارکی کوں ہوا ݙیوݨ دی موکل کائنا ݙتی ویسی۔
